Saluton!

Bedaŭrinde ne eblus al ni traduki nian tutan retpaĝaron en Esperanton, sed ĉi-paĝe ni disponigas resumajn kaj aktualajn informojn pri ni en la internacia lingvo, speciale por pasportaservanoj.

Ĉar ni loĝas en dulingva regiono, por via utilo ni montras la gravajn proprajn nomojn kaj en la loka lingvo (valencia-kataluna) kaj en la hispana (kastilia). Tio helpos vin dum via veno, ĉar foje la surstrataj kaj ŝoseaj ŝildoj ne estas dulingvaj. Ni krome inter rektaj krampoj aldonas la proksimuman prononcon per Esperanto-literoj.

Kia estas nia loĝloko kaj kion ni faras

La bieno Sant Miquel [prononcu: sant mikel'] (Esperantlingve: Sankta Mikaelo) estas nia familia bieno, havanta legom- kaj frukto-ĝardenojn, abelejon, kokinejon, kaprejon kaj ĉirkaŭan arbaron.

En ĝi ni klopodas rekuperi la bonajn kamparanajn sciojn kaj la tradiciajn kultivo-metodojn, ilin plibonigante per la nunaj teknikoj de la ekologia agrikulturo (sen pesticidoj kaj kemiaj sterkoj).

Ni klopodas, ke nia agado kaŭzu la minimuman median sekvon. Tial ni preferas simplecon, simplajn teknologiojn, far ni mem konstruadon, rimedo-ŝparon, kaj homan skalon pri ĉio kion ni faras. Ni utiligas la sun-energion por produkti elektron kaj varmigi akvon, kaj profitas de la organikaj restaĵoj per kompoŝtigo.

Ni vendas niajn produktojn (hispanlingva paĝo) kaj en la bieno mem kaj somere en la semajna vilaĝa merkato (ĉi-kaze nur la legomojn).

Krom la agrikultura laboro, ni regule organizas kaj ofertas aktivaĵojn (hispanlingva paĝo) por familioj, lernejanoj, studentoj, turistoj... Temas pri diversnivelaj praktikaj kursetoj pri niaj fakoj: ekologia legom-ĝardeno, pan-forno, abelbredado...

Kie estas nia vilaĝo

Jen la precizaĵoj por trovi nian vilaĝon sur mapo de Hispanujo:

• Vilaĝo : Lokalingve: Alcalà de Xivert [prononcu: alkala' de ŝiver']; hispanlingve: Alcalá de Chivert [prononcu: alkala' de ĉiber'].
• Latitudo : 40º 18' 18.00" norde.
• Longitudo : 0º 13' 26.40" oriente.
• Mapo en GoogleMaps.
• Provinco al kiu apartenas la vilaĝo : Hispanlingve: Castellón [prononcu: kastejon']; lokalingve: Castelló [prononcu: kastejo']. La provinca ĉefurbo nomiĝas same kiel la provinco kaj ni situas 47 kilometrojn norde de ĝi.
• Aŭtonoma komunumo al kiu apartenas la provinco : Valencia Komunumo (lokalingve: Comunitat Valenciana [prononcu: komunitat' valensjana]; hispanlingve: Comunidad Valenciana [prononcu: komunida' balensjana]).

Kie la bieno situas

Ni situas ĉ. 5 kilometrojn for de la vilaĝo, proksime de la ermitejo Sant Miquel. Antaŭ ni etendiĝas la valo de la subterakva rivero samnoma, kiu venigas la influon de la maro (rektalinie dista malpli ol 10 kilometrojn) kaj kreas grandan malferman kaj gastaman spacon meze de la valdeklivo.

La ĉirkaŭaĵo estas mozaiko de parceloj agraj (olivarbaj, karobarbaj, oranĝarbaj...) kaj arbaraj (kun pinoj, lentiskoj, rosmarenoj... kaj la malgrandaj verdaj kverkoj kiujn ni plantas ĉiujare).

Du natur-parkoj situas proksime: Serra d'Irta kaj El Prat de Cabanes-Torreblanca.

Nia anonco en Pasporta Servo, plidetaligita

La anonca spaco disponebla en Pasporta Servo devigis nin tre resumi nian tekston tie. Do jen pli detale:

• Gastoj: 5.
• Tranoktoj: 5.
• Peto: Skriba, telefona aŭ retpoŝta. Atentu: ni kutime nur semajne povas kaj viziti la poŝtoficejon kaj konsulti nian retpoŝton.
• Semajnojn antaŭe: 2
• Aldonaj kondiĉoj:
  1. Bv. obei indikotajn regulojn por respekti la Naturon. Temas pri tre ŝparema uzo de akvo kaj elektro, antaŭzorgo pri fajro, konduto ĉe bestoj kaj plantoj, klasado de postrestaĵoj por reciklado, k.a. Bv. ne preni fruktojn de la ĝardenoj, arbaro aŭ kamparo krom permesite de ni; speciale, neniam prenu ion ajn de aliies ĝardenoj, arboj aŭ kampoj.
  2. Vi ne rajtas fumi.
  3. Kunportu dormosakon. Se necese, ni povus prunti lit-kovrilon.
  4. Kunportu poŝ-lampon, aŭ prefere frunt-lampon.
  5. Nia domo estas tre malgranda. Por gastoj estas kabano kaj tendoj. En la kabano estas kvar litoj kaj unu faldebla tabul-lito. Se la kabano estus jam okupita, ekzemple de volontuloj aŭ vizitantoj, vi devus tendumi.
  6. Por gastoj estas jenaj eksterdomaj instalaĵoj: lavejo, lavabo, sun-duŝejo kaj senakva ekologia kompoŝtiga necesejo. Bonvolu ne necesejumu ekster la necesejo.
  7. Vi turisme memzorgu. Ni estas tut-tage okupitaj de la bienaj kaj hejmaj taskoj, de la infanoj kaj de niaj projektoj. Krom esceptege, ni ne havos ŝancon ĉiĉeroni vin. Tamen ni disponigos abundajn inform(il)ojn por ke vi mem vizitu la vidindaĵojn.
  8. Vi manĝe memzorgu. Vi aĉetu viajn manĝaĵojn kaj kuiru ilin en la manĝo-kabano. Tie estas manĝilaro kaj granda primuso por via uzo. Ni havas fridujon, tamen malgrandan kaj ne elektran sed per-gasan, do malpli efikan. Tial bv. laŭeble porti manĝaĵojn kiuj ne bezonas fridujon. Se vi preferas kundividi nian manĝaĵon kontraŭ mono aŭ laboro, diru kaj ni interkonsentos. Informu pri viaj manĝo-kutimoj. Ni manĝas multe da salatoj, legomaj kaj legumenacaj stufaĵoj, pasto kaj fruktoj; semajne ovojn kaj iomajn viandon (nur kokinan) kaj fiŝon. Ni manĝas prefere la fruktojn de nia ĝardeno, laŭ disponebleco, kaj kompreneble ĉiam la ovojn de niaj propraj kokinoj. La aĉetendajn manĝaĵojn ni elektas ekologiaj kiam eble laŭ disponebleco kaj prezo.
  9. Vi ire kaj vene memzorgu. Kiel supre dirite, la vilaĝo distas ĉ. 5 kilometrojn. Ni konscie klopodas uzi la aŭton nur kiam necese. Kiam eble, ankaŭ por aĉetado, ni biciklas. Estas ĉe ni pluraj bicikloj prunteblaj por gastoj. Vi kompreneble ofte povos kunveture profiti de niaj aŭtadoj por iri al la vilaĝo kaŭ reveni. Tamen ni ne povas veturigi kaj reveturigi gastojn sen kroma bezono, krom unuafoje.

Kiel kontakti nin

Jen la ĝusta kaj sufiĉa aranĝo por skribi nian adreson (poŝtkestan) sur dealilandan koverton:

Finca Sant Miquel
Apartado 48
ES-12750 Alcalà de Xivert
(Hispanujo)

Poŝtelefono: (+34) 676 042 618

Retadreso speciala por PS-aferoj: ps(HELIKO)fincasantmiquel(PUNKTO)es.

Kiel alveni

La precizan manieron veni de la vilaĝo en la bienon ni diros al vi kiam via vizito estos konfirmita. Dume jen utilaj informoj pri tio, kiel alveni en la vilaĝon kaj la tempo por piedi aŭ bicikli de ĝi en la bienon (ĉiukaze la unuan fojon ni iros renkonti vin en la vilaĝo se vi petas).

Trajne, buse, bicikle, piede

Eblas alveni en Alcalà-n per regiona trajno (hispanlingve: tren regional [prononcu: tren reĥjonal']) de la linio inter la ĉefurboj Valencio kaj Barcelono (iuj el ili atingas la francan landlimon). La trajnhaltejo komfortige situas en la vilaĝo mem. Atentu: Lastatempe tia trajno estas novnomata mez-distanca trajno (hispanlingve: tren de media distancia [prononcu: tren de medja distansja]). Temas pri la samo. Konsultu la horarojn ĉe Renfe (telefono: 902 240 202).

Se vi preferas buson, la kompanio Auto-Res (telefono: 902 020 999) ĉiutage busas de la nacia ĉefurbo Madrido kaj de la provinca ĉefurbo Castellón. La bushaltejo situas ne en la vilaĝo mem, sed ĉe apudŝosea restoracio nomita Jacinto [prononcu: ĥasinto]. Kvankam tiu restoracio tre proskimas la vilaĝon, estas tre riske piediri de unu al alia (pli facile estas bicikli). Tial, se vi venos buse, ni volonte veturos preni vin.

Estas ankaŭ lokaj busoj kiuj ligas Alcalà de Xivert kun proksimaj vilaĝoj kaj urbetoj. Ili haltas ene de la vilaĝo. Ili utilus al vi se vi jam estus en la provinco. Tiukaze petu de ni plian informon.

Ne forgesu ke eblas porti biciklon en la regionaj trajnoj senpage kaj sen antaŭaj elpaŝoj. Ankaŭ buse eblas tion; konsultu la buskompaniajn kondiĉojn.

La itinero de la vilaĝo al la bieno, ĉ. 5 kilometroj sur mallarĝa asfaltita vojo, estas agrabla kaj sendanĝera: se vi malprobable kruciĝus kun aŭtomobilo, vi aŭdus ĝin de malproksime. Bicikle la veno okupas 20-30 minutojn; piede, 40-60.

Aŭte

Aŭte alveni plej facilas per la ĉefŝoseo N-340, kiu paralelas (iomajn kilometrojn for) la marbordon. Tiu ĉefŝoseo apud-iras la vilaĝon kaj havas du nepretervideblajn elirejojn en ĝin: Se vi venas de-norde, endas elŝoseiĝi ĉe la dua elirejo; se de-sude, ĉe la unua (kio devigos vin surponte transiri la ŝoseon).